സംവിധായക കുപ്പായമണിയാൻ ഷാരൂഖ് ഖാന്റെ മകൻ ആര്യൻ ഖാൻ
സംവിധായകനാകാനൊരുങ്ങി ഷാരൂഖ് ഖാന്റെ മകൻ ആര്യൻ ഖാൻ. നെറ്റ്ഫ്ലിക്സും റെഡ് ചില്ലീസും ചേർന്ന് നിർമ്മിക്കുന്ന സീരിസാണ് ആര്യൻ ഖാൻ സംവിധാനം ചെയ്യുന്നത്. ഷാരൂഖ് ഖാൻ തന്നെയാണ് ഇക്കാര്യം ഔദ്യോഗികമായി അറിയിച്ചിരിക്കുന്നത്. 2025 ലാണ് സീരീസ് പുറത്തിറങ്ങുക.
ഷാരൂഖിന്റെ ഭാര്യ ഗൗരി ഖാനാണ് ചിത്രം നിർമിക്കുന്നത്. അതേസമയം, സീരിസിന്റെ പേരോ അഭിനേതാക്കളെയോ മറ്റു വിവരങ്ങളോ ഒന്നും തന്നെ പുറത്തുവിട്ടിട്ടില്ല. അപ്രതീക്ഷിത താരങ്ങളായിരിക്കും സീരിസിൽ എത്തുക. അതിനാൽ തന്നെ സീരീസിൽ ഷാരൂഖ് ഖാൻ അഭിനയിക്കുന്നുണ്ടോ എന്നാണ് ആരാധകർ ഉറ്റുനോക്കുന്നത്.
“ഒരു പുതിയ കഥ പ്രേക്ഷകർക്കായി അവതരിപ്പിക്കുന്ന പ്രത്യേക ദിവസമാണിത്. റെഡ് ചില്ലീസും ആര്യൻ ഖാനും നെറ്റ്ഫ്ലിക്സിലൂടെ ഒരു പുതിയ യാത്രയ്ക്കു തുടക്കം കുറിക്കുന്നു. മുന്നോട്ട് പോയി ആളുകളെ രസിപ്പിക്കുക. ഷോ ബിസിനസ്സ് പോലെ ഒരു ബിസിനസ്സും ഇല്ല” എന്നാണ് ഷാരൂഖ് ഖാൻ സമൂഹ മാധ്യമങ്ങളിൽ കുറിച്ചത്.
