പത്തനംതിട്ട : കെഎസ്ആര്‍ടിസി ബസിന് തീപിടിച്ച് അപകടം. അട്ടത്തോട് ഭാഗത്താണ് രാവിലെ അഞ്ചേകാലോടെയാണ് അപകടമുണ്ടായത്. പമ്പയില്‍ നിന്ന് നിലയ്ക്കലേക്ക് പോകുകയായിരുന്ന ബസാണ് പൂര്‍ണമായും കത്തി നശിച്ചത്.ഷോര്‍ട്ട് സര്‍ക്യൂട്ടാണ് അപകട കാരണമെന്നാണ് പ്രാഥമിക നിഗമനം.
ഡ്രൈവറും കണ്ടക്ടറും മാത്രമാണ് ബസിലുണ്ടായിരുന്നത്. ആര്‍ക്കും പരിക്കുകളില്ല. തീര്‍ത്ഥാടകരെ കൊണ്ടുവരുന്നതിനായി പമ്പയില്‍ നിന്ന് നിലയ്ക്കലേക്ക് രാവിലെ പോകുകയായിരുന്നു ബസ്. അട്ടത്തോട് ഭാഗത്ത് വന്നപ്പോഴാണ് ബസിന്റെ മുന്‍ഭാഗത്ത് നിന്ന് തീ ഉയരുന്നതായി കണ്ടത്.
അപകടമുണ്ടായ സമയത്ത് ബസിന് പിന്നാലെ മറ്റ് വാഹനങ്ങളും വരുന്നുണ്ടായിരുന്നു. പ്രദേശത്ത് മൊബൈല്‍ റേഞ്ചിന് പ്രശ്‌നമുണ്ടായിരുന്നതിനാല്‍ ഫയര്‍ ഫോഴ്‌സിനെ വിളിക്കാന്‍ ബുദ്ധിമുട്ട് നേരിട്ടതായി ജീവനക്കാര്‍ വ്യക്തമാക്കി. ഫയര്‍ ഫോഴ്‌സ് എത്തിയപ്പോഴേക്കും ബസ് പൂര്‍ണമായും കത്തിനശിച്ചിരുന്നു. സംഭവത്തെക്കുറിച്ച് അന്വേഷണം ആരംഭിച്ചിട്ടുണ്ട്.
