റാപ്പർ ഡാബ്സി അറസ്റ്റിൽ
സാമ്പത്തിക തർക്കത്തെ തുടർന്ന് പോലീസ് കസ്റ്റഡിയിലെടുത്തു, പിന്നീട് ജാമ്യത്തിൽ വിട്ടു
മലപ്പുറം: സാമ്പത്തിക ഇടപാടുമായി ബന്ധപ്പെട്ട തർക്കത്തെ തുടർന്ന് പ്രശസ്ത റാപ്പർ ഡാബ്സി എന്ന മുഹമ്മദ് ഫാസിലിനെയും മൂന്ന് സുഹൃത്തുക്കളെയും ചങ്ങരംകുളം പോലീസ് അറസ്റ്റ് ചെയ്തു. വെള്ളിയാഴ്ച രാത്രിയാണ് സംഭവം. അറസ്റ്റ് രേഖപ്പെടുത്തിയ ശേഷം നാലുപേരെയും സ്റ്റേഷൻ ജാമ്യത്തിൽ വിട്ടയച്ചു.
കാഞ്ഞിയൂർ സ്വദേശിയായ ബാസിലും അദ്ദേഹത്തിന്റെ പിതാവും നൽകിയ പരാതിയുടെ അടിസ്ഥാനത്തിലാണ് പോലീസ് നടപടി. പരാതിയെ തുടർന്ന് ഡാബ്സിയെയും സംഘത്തെയും പോലീസ് കസ്റ്റഡിയിലെടുത്ത് സ്റ്റേഷനിലെത്തിക്കുകയായിരുന്നു. തുടർന്ന് ഇവരുടെ അറസ്റ്റ് രേഖപ്പെടുത്തി ജാമ്യം അനുവദിച്ചു.
‘ഇല്ലുമിനാട്ടി’, ‘വട്ടേപ്പം’ തുടങ്ങിയ ഹിറ്റ് ഗാനങ്ങളിലൂടെ ശ്രദ്ധേയനായ റാപ്പറാണ് ഡാബ്സി. ഈ വർഷം ജനുവരിയിൽ, സംഗീതലോകത്തുനിന്ന് ഒരു വർഷത്തെ ഇടവേളയെടുക്കുകയാണെന്ന് അദ്ദേഹം പ്രഖ്യാപിച്ചിരുന്നു. തന്റെ കരിയറിലെ വളർച്ചയ്ക്കും ക്രിയേറ്റിവിറ്റിക്കും കൂടുതൽ ശ്രദ്ധ നൽകാനാണ് ഈ തീരുമാനമെന്നായിരുന്നു ഡാബ്സി അന്ന് വ്യക്തമാക്കിയത്.
