ബിജെപി സഖ്യകക്ഷിയായ കേന്ദ്രമന്ത്രി എച്ച്ഡി കുമാരസ്വാമിയുടെ മകൻ നിഖിൽ കുമാരസ്വാമി ചന്നപട്ടണയിൽ കോൺഗ്രസിന്റെ സിപി യോഗേശ്വരയോട് 25,413 വോട്ടിന് പരാജയപ്പെട്ടു. മുൻ പ്രധാനമന്ത്രി എച്ച്ഡി ദേവഗൗഡയുടെ ചെറുമകനും നടനും രാഷ്ട്രീയ നേതാവുമായ നിഖിൽ കുമാരസ്വാമി 87,229 വോട്ടുകൾ നേടിയപ്പോൾ ബിജെപിയിൽ നിന്ന് പുറത്തുപോയ യോഗേശ്വരയ്ക്ക് 1,12,642 വോട്ടുകൾ ലഭിച്ചു.
ദേവഗൗഡയും ബിഎസ് യെദ്യൂരപ്പയും ഉൾപ്പെടെയുള്ള ബിജെപി-ജെഡിഎസ് നേതാക്കൾ ചന്നപട്ടണയിൽ നിഖിലിനുവേണ്ടി പ്രചാരണം നടത്തിയിരുന്നു. ഈ മണ്ഡലത്തിൽ നിന്ന് അഞ്ച് തവണ എംഎൽഎയും മുൻ മന്ത്രിയുമായ യോഗേശ്വര, നാമനിർദ്ദേശ പത്രിക നൽകുന്നതിന് മുമ്പ് ബിജെപി വിട്ട് കോൺഗ്രസിൽ ചേർന്നിരുന്നു.
ചന്നപട്ടണയിലെ വിജയത്തോടെ സംസ്ഥാനത്തെ മൂന്ന് ഉപതെരഞ്ഞെടുപ്പുകളിലും കോൺഗ്രസ് വിജയിച്ചു. കർണാടക മുൻ മുഖ്യമന്ത്രി ബസവരാജ് ബൊമ്മൈയുടെ മകൻ ഭരത് ബൊമ്മൈ ഷിഗാഗാവ് ഉപതെരഞ്ഞെടുപ്പിൽ കോൺഗ്രസിന്റെ യാസിർ പഠാനോട് പരാജയപ്പെട്ടു.
ആദ്യകാല ട്രെൻഡുകൾ തുടക്കത്തിൽ ഭരത് ബൊമ്മൈയാണ് മുന്നിലെത്തിയത്.
‘ഭരത് ബൊമ്മൈയുടേത് വെറുമൊരു പരാജയമാണെന്ന് ഞാൻ പറയുന്നില്ല, ഇത് അദ്ദേഹത്തിന്റെ പിതാവ് ചെയ്ത കാര്യങ്ങൾക്ക് ജനങ്ങൾ നൽകിയ മറുപടിയാണെന്നും വികസനവും വിശ്വാസവും മാത്രമേ ജനങ്ങൾ കാര്യമാക്കുള്ളൂവെന്നും ഉപമുഖ്യമന്ത്രി ഡി കെ ശിവകുമാർ പറഞ്ഞു.
മുഖ്യമന്ത്രിക്കും മന്ത്രിമാർക്കും സർക്കാരിനുമെതിരെ പ്രതിപക്ഷ പാർട്ടികൾ നിരവധി ആരോപണങ്ങൾ ഉന്നയിച്ചെങ്കിലും തെറ്റായ ആരോപണങ്ങൾ ബിജെപിക്കും ജെഡിഎസിനും ഗുണം ചെയ്തില്ലെന്നും ശിവകുമാർ പറഞ്ഞു.
