ഹൊറർ കോമഡി ചിത്രം ഭൂല്‍ ഭുലയ്യ 3 ലെ പുതിയ ഗാനം പുറത്ത്. അമി ജേ തൊമാർ എന്ന ഗാനത്തിന്റെ പുത്തൻ പതിപ്പിന്റെ വീഡിയോയാണ് പുറത്തുവന്നിരിക്കുന്നത്. ശ്രേയ ഘോഷാൽ ആലപിച്ചിരിക്കുന്ന ഗാനത്തിന് അമി ജേ തൊമാർ 3.0 എന്നാണ് പേര് നൽകിയിരിക്കുന്നത്. മാധുരി ദീക്ഷിത്തും വിദ്യ ബാലനും തമ്മിലുള്ള ഒരു നൃത്ത മത്സരമാണ് വീഡിയോയിൽ നമുക്ക് കാണാൻ സാധിക്കുക. സമീരിന്റെ വരികൾക്ക് അമാൽ മാലിക്കാണ് സംഗീതം നൽകിയിരിക്കുന്നത്. വീഡിയോ അതിവേഗം തന്നെ വൈറലായി മാറിയിട്ടുണ്ട്.
കാർത്തിക് ആര്യൻ, മാധുരി ദീക്ഷിത്ത്, വിദ്യ ബാലൻ, ത്രിപ്തി ദിമ്രി, സഞ്ജയ് മിശ്ര, രാജ്പാൽ യാദവ്, അശ്വിനി കൽസേക്കർ, വിജയ് റാസ്, മനീഷ് വാധ്വ, രാജേഷ് ശർമ്മ എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്. ടി സിരീസ് ഫിലിംസ്, സിനി1 സ്റ്റുഡിയോസ് എന്നീ ബാനറുകളില്‍ ഭൂഷന്‍ കുമാര്‍, കൃഷന്‍ കുമാര്‍, മുറാദ് ഖേതാനി എന്നിവർ ചേർന്നാണ് ചിത്രം നിര്‍മ്മിക്കുന്നത്.
മലയാള സിനിമയായ മണിച്ചിത്രത്താഴിന്റെ ഹിന്ദി പതിപ്പാണ് ഭൂല്‍ ഭുലയ്യ. ഭൂല്‍ ഭുലയ്യ 1,2 വമ്പൻ ഹിറ്റായിരുന്നു. അതിനാൽ തന്നെ ആരാധകർ ഏറെ ആവേശത്തോടെയാണ് മൂന്നാം ഭാഗത്തിനായി കാത്തിരിക്കുന്നത്. ഭൂൽ ഭുലയ്യ 3യുടെ ട്രെയിലര്‍ അടുത്തിടെയാണ് പുറത്തിറങ്ങിയത്. അതേസമയം, പ്രിയദർശൻ സംവിധാനം ചെയ്ത ഭൂൽ ഭുലയ്യയുടെ ഒന്നാം ഭാഗത്തിൽ അക്ഷയ് കുമാറായിരുന്നു നായകൻ. എന്നാൽ രണ്ടാം ഭാഗമെത്തിയപ്പോൾ നടനൊപ്പം സംവിധായകനും മാറി. അക്ഷയ് കുമാറിന് പകരം കാർത്തിക് ആര്യനാണ് തുടർന്നുള്ള രണ്ട് ഭാഗങ്ങളിലും നായകനായെത്തിയത്.
മണിച്ചിത്രത്താഴിൽ ശോഭന കട്ടിൽ ഉയർത്തിയത് പോലെ ഭൂൽ ഭുലയ്യ മൂന്നിൽ വിദ്യ ബാലൻ സിംഹാസനം എടുത്തുയർത്തുന്ന രംഗമുണ്ട്. എന്തായാലൂം, ഹൊറർ ചിത്രമാണെങ്കിലും കളര്‍ഫുള്ളായ ഒരു കോമഡി എന്റർടൈനറാണ് ഒരുങ്ങുന്നത് എന്നാണ് ടീസര്‍ നല്‍കുന്ന സൂചന.
