വിജയ് രാഷ്ട്രീയത്തിൽ സജീവമാകുന്നതിനെ തുടര്‍ന്ന് സിനിമയില്‍ നിന്ന് ഇടവേളയെടുക്കാന്‍ തീരുമാനിച്ചിട്ടുള്ളത് നേരത്തെ തന്നെ പ്രഖ്യാപിച്ചിട്ടുണ്ട്. ‘ദളപതി 69’ വിജയിയുടെ അവസാന സിനിമയായിരിക്കുമെന്നാണ് കരുതുന്നത്. അതിനാൽ തന്നെ ചിത്രത്തെ കുറിച്ചുള്ള ഓരോ വാർത്തകളും ആരാധകർ ആവേശത്തോടെയാണ് ഏറ്റെടുക്കുന്നത്. ചിത്രത്തെ സംബന്ധിച്ചുള്ള നിരവധി പ്രതീക്ഷകളോടെയാണ് ആരാധകർ മുന്നോട്ടുപോകുന്നത്. താരത്തിന്റെ അവസാന സിനിമയായിരിക്കുമെന്ന് കരുതപ്പെടുന്ന ദളപതി 69, വിജയ്‌യുടെ കരിയറില്‍ ഒരു 1000 കോടി ക്ലബ് ചിത്രം ആകുമോ എന്ന് കാത്തിരിക്കുകയാണ്.
വിജയ് അഭിനയിച്ച് ഏറ്റവും വലിയ ഹിറ്റാക്കിയ ‘ലിയോ’ ആഗോളതലത്തില്‍ നേടിയത് 620 കോടി രൂപയോളമാണ്. ദളപതി 69 ലൂടെ 1000 കോടി തികച്ച് സിനിമയില്‍ നിന്ന് മാറാൻ വിജയിക്ക് കഴിയുമോ എന്ന ചോദ്യത്തിന്റെ ഉത്തരത്തിനായുള്ള കാത്തിരിപ്പിലാണ് ആരാധകവൃന്ദം.
എല്ലാത്തരം ഇമോഷണലുകള്‍ക്കും സംവിധായകൻ എച്ച് വിനോദ് ചിത്രത്തില്‍ പ്രധാന്യം നല്‍കും എന്നാണ് കരുതുന്നതും. കാസ്റ്റിംഗും അത്തരത്തിലുള്ളതാണെന്നാണ് താരങ്ങളെ പ്രഖ്യാപിച്ചപ്പോള്‍ സിനിമാ ആസ്വാദകര്‍ക്ക് മനസ്സിലായത്.
ചിത്രീകരണം ആരംഭിച്ചതായാണ് പുതിയ റിപ്പോർട്ടുകൾ. വലിയ ക്യാന്‍വസില്‍ ഒരു ഗാനരംഗം ഷൂട്ട് ചെയ്യുന്നതായും ഇതിന്റെ കൊറിയോഗ്രാഫി ശേഖര്‍ മാസ്റ്റര്‍ ചെയ്യുന്നുവെന്നും സൂചനകളുണ്ട്. സത്യന്‍ സൂര്യന്‍ ഛായാഗ്രഹണവും അനിരുദ്ധ് രവിചന്ദര്‍ സംഗീത സംവിധാനവും നിര്‍വഹിക്കുന്നു.
