ഓടിക്കൊണ്ടിരിക്കുന്ന ട്രെയിനില്‍ നിന്ന് വീണ യാത്രക്കാരൻ്റെ രക്ഷകനായി പോലീസ്
ന്യൂഡല്‍ഹി: ഗുജറാത്തില്‍ ട്രെയിനില്‍ കയറുന്നതിനിടെ പാളത്തില്‍ വീണ യാത്രക്കാരന് രക്ഷകനായി പോലീസ്. സംഭവത്തിന്‍രെ ചിത്രങ്ങളും വീഡിയോയും വൈറലാണ്. ഗുജറാത്തിലെ വാപി റെയില്‍വേ സ്റ്റേഷനില്‍ ഓടുന്ന ട്രെയിനിലേക്ക് ചാടാന്‍ ശ്രമിക്കുന്നതിനിടെയാണ് അല്‍പേഷ് ചൗഹാന്‍ എന്ന വ്യക്തി പ്ലാറ്റ്ഫോമിനും ട്രെയിനിനുമിടയിലുള്ള വിടവിലൂടെ തെന്നി വീണത്. സമീപത്ത് നിന്ന പോലീസ് കോണ്‍സ്റ്റബിള്‍ യോഗേഷ് ജഗുഭായ് ഇത് കാണുകയും പെട്ടെന്ന് ട്രെയിനിനടിയില്‍ നിന്ന് അല്‍പേഷിനെ പുറത്തെടുക്കുകയുമായിരുന്നു.
അല്‍പേഷ് ചൗഹാന്‍ വാപിയില്‍ നിന്ന് ബറൂച്ചിലെ വീട്ടിലേക്ക് പോകുമ്പോഴാണ് സംഭവം നടന്നത്. സംഭവം സ്‌റ്റേഷനിലെ സിസിടിവിയില്‍ പതിഞ്ഞതിനാല്‍ തന്നെ അത്ഭുതകരമായ രക്ഷപ്പെടലും ദാവമായി എത്തിയ പോലീസുകാരന് അഭിനന്ദന പ്രവാഹമാണ് സോഷ്യല്‍ മീഡിയയില്‍. സ്തുത്യര്‍ഹമായ ജോലിയാണ് തങ്ങളുടെ പോലീസ് ചെയ്തതെന്ന് കോണ്‍സ്റ്റബിളിന്റെ ശ്രമങ്ങളെ പിന്തുണച്ച് ഗുജറാത്ത് പോലീസ് അഭിനന്ദിച്ചു.
ഇങ്ങനെയാവണം പോലീസെന്നും നിങ്ങളാണ് യഥാര്‍ത്ഥ കാവല്‍ക്കാരനെന്നുമൊക്കെയുള്ള വളരെ അഭിമാനപരമായ കുറിപ്പുകളാണ് സോഷ്യല്‍ മീഡിയയില്‍ പോലീസ് കോണ്‍സ്റ്റബിളിന് ലഭിച്ചിരിക്കുന്നത്. മറ്റൊരാളെ സഹായിച്ചത് വലിയ കാര്യമല്ലെന്നും താന്‍ തന്റെ ജോലിയാണ് ചെയ്തതെന്നും പോലീസ് കോണ്‍സ്റ്റബിള്‍ വ്യക്തമാക്കി.
