തിരുവനന്തപുരം: എറണാകുളം, ആലപ്പുഴ, പത്തനംതിട്ട ജില്ലകളിലെ കടകളില്‍ നിന്ന് ശേഖരിച്ച പച്ചക്കറി, പഴവര്‍ഗ്ഗങ്ങളില്‍ 31 എണ്ണത്തില്‍ കീടനാശിനിയുടെ സാന്നിദ്ധ്യം കണ്ടെത്തി. കൃഷി വകുപ്പിന്റെ ‘സേഫ് ടു ഈറ്റ്’ പദ്ധതി പ്രകാരമായിരുന്നു പരിശോധന. 31 പച്ചക്കറികളിലും, 12 പഴവര്‍ഗ്ഗങ്ങളിലുമാണ് കീടനാശിനി അവശിഷ്ടങ്ങള്‍ കണ്ടെത്തിയത്. 15.9% പരിശോധനാ സാമ്പിളുകളിലാണ് അനുവദനീയമായ അളവിലും കൂടുതലുള്ള കീടനാശിനി അവശിഷ്ടങ്ങള്‍ കണ്ടെത്തിയത്.
19 പച്ചക്കറികള്‍, 12 പഴങ്ങള്‍
31 സാമ്പിളുകളില്‍ 19 പച്ചക്കറികളും 12 പഴങ്ങളും ഉള്‍പ്പെടുന്നുവെന്ന് 2024 ഏപ്രില്‍-ജൂണ്‍ കാലയളവില്‍ വെള്ളായണിയിലെ കേരള അഗ്രികള്‍ച്ചറല്‍ യൂണിവേഴ്‌സിറ്റിയിലെ (കെഎയു) പെസ്റ്റിസൈഡ് റെസിഡ്യൂ റിസര്‍ച്ച് ആന്‍ഡ് അനലിറ്റിക്കല്‍ ലബോറട്ടറി (പിആര്‍ആര്‍എല്‍) നടത്തിയ പരിശോധനയില്‍ തെളിഞ്ഞിരിക്കുകയാണ്. 12 കീടനാശിനികളും ഒരു കുമിള്‍നാശിനിയുമാണ് അവശിഷ്ടങ്ങള്‍.
കൃഷി വകുപ്പിന്റെ ‘സേഫ് ടു ഈറ്റ്’ പദ്ധതിക്ക് കീഴിലാണ് പരിശോധന നടത്തുന്നത്. പച്ചക്കറികളില്‍, കാപ്‌സിക്കം, കയ്പക്ക, വഴുതന, ബീന്‍സ്, ബീറ്റ്‌റൂട്ട്, കാരറ്റ്, പച്ചമുളക്, വെള്ളരി, നേന്ത്രന്‍ വാഴ, സാലഡ് വെള്ളരി എന്നിവയില്‍ കീടനാശിനിയുടെ അവശിഷ്ടങ്ങള്‍ കണ്ടെത്തി. അവശിഷ്ടങ്ങള്‍ ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ് അതോറിറ്റി ഓഫ് ഇന്ത്യ/കോഡെക്സ് (എഫ്എസ്എസ്എഐ/കോഡെക്സ്) നിര്‍ദ്ദേശിച്ച പരിധിക്ക് മുകളിലാണ്. പഴങ്ങളില്‍, മുന്തിരി, ആപ്പിള്‍, മാങ്ങ, മുസംബി (സിട്രസ് ലിമെറ്റ), പപ്പായ (റെഡ് ലേഡി ഇനം), പച്ച ആപ്പിള്‍ എന്നിവയില്‍ കീടനാശിനിയുടെ സാന്നിദ്ധ്യം കണ്ടെത്തി.
ഗവണ്‍മെന്റിന്റെ ‘സേഫ് ടു ഈറ്റ്’ സംരംഭത്തിന് കീഴില്‍ നടത്തിയ ഏറ്റവും പുതിയ റൗണ്ട് പരിശോധനയില്‍ എറണാകുളം, ആലപ്പുഴ, പത്തനംതിട്ട ജില്ലകളിലെ 15 ബ്ലോക്കുകള്‍, 14 മുനിസിപ്പാലിറ്റികള്‍, ഒരു കോര്‍പ്പറേഷന്‍ (കൊച്ചി കോര്‍പ്പറേഷന്‍) എന്നിവ ഉള്‍പ്പെടുന്നു. അസിഫേറ്റ്, ക്ലോത്തിയാനിഡിന്‍, തയാമെത്തോക്സം, ഒമേത്തോയേറ്റ്, ക്വിനാല്‍ഫോസ്, മെത്തമിഡോഫോസ്, അസറ്റാമിപ്രിഡ്, മോണോക്രോട്ടോഫോസ്, ഇമിഡാക്ലോപ്രിഡ്, ട്രൈസൈക്ലസോള്‍ തുടങ്ങിയ കീടനാശിനികളുടെ സാന്നിധ്യം പരിശോധനയില്‍ കണ്ടെത്തി.
ആപ്പിള്‍, പേരക്ക എന്നിവയും
സാധാരണ കീടനാശിനിയുടെ സാന്നിദ്ധ്യം കണ്ടെത്താറുള്ള മുന്തിരിക്കുപുറമേ പേരയ്ക്ക, ആപ്പിള്‍ തുടങ്ങിയ പഴങ്ങളില്‍ മലിനീകരണം ഉണ്ടെന്ന് സമീപകാല ഫലങ്ങള്‍ വെളിപ്പെടുത്തുന്നു. കൊല്ലം, ഇടുക്കി, മലപ്പുറം ജില്ലകളിലെ 2024 ജനുവരി-മാര്‍ച്ച് മാസങ്ങളിലെ പിആര്‍ആര്‍എഎല്‍ റിപ്പോര്‍ട്ട് പരിശോധിച്ച 192 സാമ്പിളുകളില്‍ 14.06 ശതമാനത്തിലും കീടനാശിനി അവശിഷ്ടങ്ങള്‍ കണ്ടെത്തിയിരുന്നു. തിരുവനന്തപുരം, കണ്ണൂര്‍, പാലക്കാട് എന്നിവിടങ്ങളിലെ 2023 ഒക്ടോബര്‍-ഡിസംബര്‍ റിപ്പോര്‍ട്ടില്‍ 16.75% സാമ്പിളുകളില്‍ അവശിഷ്ടങ്ങള്‍ കണ്ടെത്തി.
കീടനാശിനി അവശിഷ്ടങ്ങള്‍ സൃഷ്ടിക്കുന്ന അപകടങ്ങളെക്കുറിച്ച് പങ്കാളികളെ ബോധവാന്മാരാക്കുന്നതില്‍ കൂടുതല്‍ സജീവമായ പങ്ക് വഹിക്കുന്നുണ്ടെന്ന് ഉറപ്പുവരുത്തുന്നതിനായി 2023-ല്‍ കൃഷി വകുപ്പ് ‘സേഫ് ടു ഈറ്റ്’ പദ്ധതിക്ക് കീഴില്‍ നിരീക്ഷണ സാമ്പിളുകളുടെ ശേഖരണം നവീകരിച്ചിരുന്നു. ഭക്ഷ്യസുരക്ഷാ വകുപ്പ് ഉദ്യോഗസ്ഥരാണ് ഇപ്പോള്‍ സാമ്പിളുകള്‍ ശേഖരിക്കുന്നത്.
