Crime
പെണ്‍കുട്ടിക്ക് രാസലഹരി നല്‍കി 5 വർഷത്തോളം പീഡിപ്പിച്ച ഗഫൂർ പിടിയില്‍
മലപ്പുറം: ഭക്ഷണത്തില്‍ രാസലഹരി കലർത്തി നല്‍കി പ്രായപൂർത്തിയാകാത്ത പെൺകുട്ടിയെ അഞ്ച് വർഷത്തോളം പീഡിപ്പിച്ചയാള്‍ അറസ്റ്റിൽ. ചേറൂർ സ്വദേശി അലുങ്ങൽ അബ്ദുൽ ഗഫൂറി(23)നെയാണ് പോക്സോ കേസിൽ അറസ്റ്റ് ചെയ്തത്.
പെണ്‍കുട്ടി പ്ലസ് വണ്‍ പഠിക്കുന്ന കാലംമുതല്‍ പ്രതിയുടെ പീഡനത്തിന് ഇരയായിരുന്നുവെന്നാണ് പരാതി. പെൺകുട്ടിയുടെ നഗ്ന ദൃശ്യം പകർത്തുകയും, ഇത് കാണിച്ച് ഭീഷണിപ്പെടുത്തി സ്വർണാഭരണം തട്ടിയെടുക്കുകയും ചെയ്തിരുന്നു.
മലപ്പുറം കോട്ടക്കലിലാണ് സംഭവം. 2020 ൽ പെൺകുട്ടി പ്ലസ് വൺ വിദ്യാർഥിനി ആയിരിക്കെ തുടങ്ങിയ പീഡനം 2025 മാർച്ച് വരെ തുടർന്നു. പെൺകുട്ടിയെ ചികിത്സയ്ക്ക് വിധേയയാക്കിയിരുന്നു. പിന്നാലെ ലഹരിയിൽ നിന്ന് മോചിതയായ ശേഷമാണ് കോട്ടയ്ക്കൽ പൊലീസിൽ പരാതി നൽകിയത്.
