ഇതിഹാസ താരം ലയണല്‍ മെസി ഇന്റർ മിയാമി വിടുമെന്ന് സൂചന. സൗദി അറേബ്യയിലെ പ്രമുഖ ക്ലബ്ബിലേക്കാണ് മെസി ചേക്കേറുക എന്ന സൂചനകളാണ് പുറത്ത് വരുന്നത്. 2023 ൽ ആണ് പാരിസ് സെന്റ് ജർമ്മനിൽ നിന്ന് ഇന്റർ മിയാമിയിൽ എത്തിയത്. 47 ഗോളുകളും 21 അസിസ്റ്റുകളുമായി ഇന്റർമിയാമിയിൽ മിന്നുന്ന ഫോമിലാണ് മെസി.
2025 ഡിസംബർ വരെയാണ് മിയാമിയുമായി മെസിയുടെ കരാർ. കാലാവധി പൂർത്തിയാകുന്നതിന് മുൻപ് തന്നെ മെസി മിയാമി വിടും എന്ന അഭ്യൂഹങ്ങൾ ശക്തമാണ്. മെസിയുടെ പ്രതിനിധികളും സൗദി പ്രോ ലീഗും തമ്മിൽ ചർച്ചകൾ ഇതിനകം ആരംഭിച്ച് കഴിഞ്ഞതായി സൗദി മാധ്യമങ്ങളിൽ നിന്നുള്ള റിപ്പോർട്ടുകൾ സൂചിപ്പിക്കുന്നു. ഇത് നടന്നാൽ ഫുട്ബോൾ ചരിത്രത്തിലെ ഏറ്റവും വലിയ ട്രാൻസ്ഫറിന് ആയിരിക്കും ലോകം സാക്ഷ്യം വഹിക്കുക.
വരാനിരിക്കുന്ന വേനൽക്കാല ട്രാൻസ്ഫർ വിൻഡോയിൽ മെസിയെ എത്തിക്കാൻ സൗദി അറേബ്യൻ പബ്ളിക്ക് ഇൻവെസ്റ്റ്മെൻ്റ് ഫണ്ട് സജീവമായി ഇടപെടുന്നുണ്ട്. സൗദിയിലെ ഏത് ക്ലബ്ബ് എന്ന കാര്യത്തിൽ സ്ഥിരികരണം ആയിട്ടല്ല. എങ്കിലും മെസി ഓഫറുകൾ ഗൗരവമായി പരിഗണിക്കുന്നുണ്ടെന്നാണ് റിപ്പോർട്ട്. എലൈറ്റ് ലെവൽ ഫുട്ബോളിനുള്ള ഒരു പുതിയ കേന്ദ്രമായി രാജ്യത്തിന്റെ സ്ഥാനം ഉറപ്പിക്കുന്നതിനുള്ള സൗദി ഫുട്ബോൾ അധികൃതരുടെ മറ്റൊരു പ്രധാന നീക്കമാണ് മെസിയെ എത്തിക്കാനുള്ള ശ്രമം.
