തിരുവനന്തപുരം : സ്പീക്കർക്ക് അവകാശ ലംഘന പരാതി നൽകി ചാണ്ടി ഉമ്മൻ എംഎൽഎ. തന്നെ മനപ്പൂർവ്വം അപമാനിക്കാൻ വേണ്ടി പല പൊതുപരിപാടികളിൽ നിന്നും ഒഴിവാക്കുന്നു എന്ന് ചാണ്ടി ഉമ്മൻ എംഎൽഎ പരാതിയിൽ പറയുന്നു. ഒരു എംഎൽഎ ആയിരുന്നിട്ട് പോലും തന്നെ തന്റെ മണ്ഡലത്തിൽ നടന്ന ഉപജില്ലാ കലോത്സവ വേദിയിൽ നടക്കുന്ന ചടങ്ങിലേക്ക് ക്ഷണിച്ചില്ല.
സംഘാടകരുടെ ഈ പെരുമാറ്റം തന്നെ അപമാനിക്കാൻ വേണ്ടിയുള്ളതാണെന്ന് വ്യക്തമാക്കുന്നതാണ് പരാതി. സ്പീക്കർക്ക് നൽകിയ പരാതി പോലെ തന്നെ മുഖ്യമന്ത്രി പിണറായി വിജയനും പരാതി നൽകിയിട്ടുണ്ട് എന്നാണ് വിവരം. തന്നെ അപമാനിക്കാനുള്ള ഇത്തരം നടപടി യത്ഥാർത്ഥത്തിൽ അവകാശ ലംഘനമാണെന്നും കഴിഞ്ഞ കുറേ നാളുകളായി ഈ പ്രവണത തുടരുകയാണെന്നും ചാണ്ടി ഉമ്മൻ പരാതിയായി പറയുന്നു.
പരാതി നൽകിയതിന് പിന്നാലെ ചാണ്ടി ഉമ്മൻ മാധ്യമങ്ങളോട് പ്രതികരിച്ചു. സർക്കാരിന്റെ പല പരിപാടികളും തന്നെ അറിയിക്കാത്തത് ഖേദകരമാണെന്നും അത് ഇനിയെങ്കിലും തിരുത്തുമെന്ന് പ്രതീക്ഷിക്കുന്നു എന്നും ചാണ്ടി ഉമ്മൻ പറഞ്ഞു.
