വെയിലിനെ സൂക്ഷിക്കണം; കൊല്ലത്ത് തീവ്രത കൂടിയ അൾട്രാവയലറ്റ്; 10 കടന്നാൽ പിന്നെ റെഡ് അലർട്ട്

സംസ്ഥാനത്ത് ഇന്നലെ ഏറ്റവും കൂടുതൽ തീവ്രതയുള്ള അൾട്രാവയലറ്റ് രശ്മികൾ രേഖപ്പെടുത്തിയത് കൊല്ലം കൊട്ടാരക്കരയിൽ. യുവി ഇൻഡക്‌സ് 10 ആണ് കൊട്ടാരക്കരയിൽ രേഖപ്പെടുത്തിയതെന്ന് സംസ്ഥാന ദുരന്തനിവാരണ സമിതി. യുവി ഇൻഡക്‌സ് 8 മുതൽ 10 വരെ അതീവ ജാഗ്രത പാലിക്കേണ്ട ഓറഞ്ച് അലർട്ട് സാഹചര്യമാണ്.

പത്തനംതിട്ട കോന്നി, ആലപ്പുഴ ചെങ്ങന്നൂർ, ഇടുക്കി മൂന്നാർ എന്നിവിടങ്ങളിൽ യു.വി ഇൻഡക്‌സ് 9 ആണ് രേഖപ്പെടുത്തിയത്. കോട്ടയം ചങ്ങനാശ്ശേരി, പാലക്കാട് തൃത്താല, മലപ്പുറം പൊന്നാനി എന്നിവിടങ്ങളിൽ യു.വി ഇൻഡക്‌സ് 8ഉം രേഖപ്പെടുത്തി.

തിരുവനന്തപുരം വിളപ്പിൽശാല, എറണാകുളം കളമശ്ശേരി, തൃശൂർ ഒല്ലൂർ, കോഴിക്കോട് ബേപ്പൂർ എന്നിവിടങ്ങളിൽ യു.വി ഇൻഡക്‌സ് 6 ആണ് രേഖപ്പെടുത്തിയത്. മുൻകരുതൽ സ്വീകരിക്കേണ്ട സാഹചര്യമാണ് ഇവിടങ്ങളിലും.

യു.വി ഇൻഡക്‌സ് 11ന് മുകളിലായാൽ റെഡ് അലർട്ടാണ്. ഏറ്റവും ഗുരുതരമായ ഈ സാഹചര്യത്തിൽ നേരിട്ട് സൂര്യപ്രകാശം ശരീരത്തിൽ കൂടുതൽ സമയം ഏൽക്കുന്നത് അപകടകരമാണ്. കഴിഞ്ഞ 24 മണിക്കൂറിൽ കേരളത്തിലെ കാലാവസ്ഥാ നിരീക്ഷണ കേന്ദ്രങ്ങളിൽ എവിടെയും യു.വി ഇൻഡക്‌സ് 10ന് മുകളിൽ രേഖപ്പെടുത്തിയിട്ടില്ല.

തുടർച്ചയായി കൂടുതൽ സമയം അൾട്രാവയലറ്റ് രശ്മികൾ ശരീരത്തിൽ ഏൽക്കുന്നത് സൂര്യാതപത്തിനും ത്വക്ക് രോഗങ്ങൾക്കും നേത്രരോഗങ്ങൾക്കും മറ്റ് ആരോഗ്യ പ്രശ്‌നങ്ങൾക്കും കാരണമായേക്കാം. പൊതുജനങ്ങൾ സുരക്ഷാമുൻകരുതലുകൾ സ്വീകരിക്കണമെന്ന് ദുരന്തനിവാരണ സമിതി അറിയിച്ചു.

പകൽ 10 മണി മുതൽ മൂന്ന് മണി വരെയുള്ള സമയങ്ങളിലാണ് ഉയർന്ന അൾട്രാവയലറ്റ് സൂചിക രേഖപ്പെടുത്തപ്പെടുന്നത്. ആ സമയങ്ങളിൽ കൂടുതൽ നേരം ശരീരത്തിൽ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കണം.