തിരുവനന്തപുരം: കേരളത്തിൽ ഇന്ന് സ്വർണ്ണവിലയിൽ മാറ്റമില്ലാതെ വ്യാപാരം പുരോഗമിക്കുന്നു. ഒരു ഗ്രാം 22 കാരറ്റ് സ്വർണ്ണത്തിന് 8,755 രൂപയും ഒരു പവൻ സ്വർണ്ണത്തിന് 70,040 രൂപയുമാണ് ഇന്നത്തെ വില. കഴിഞ്ഞ രണ്ട് ദിവസത്തിനിടെ പവന് 1,800 രൂപയും ഗ്രാമിന് 225 രൂപയും കുറഞ്ഞതിന് ശേഷമാണ് ഇന്ന് വില മാറ്റമില്ലാതെ നിൽക്കുന്നത്.
അതേസമയം, വെള്ളിയുടെ വിലയിൽ രണ്ട് വിഭാഗം വ്യാപാരി സംഘടനകൾ വ്യത്യസ്ത വിലകളാണ് നൽകുന്നത്. ഭീമ ഗ്രൂപ്പ് ചെയർമാൻ ഡോ.ബി. ഗോവിന്ദൻ നേതൃത്വം നൽകുന്ന ഓൾ കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ (എകെജിഎസ്എംഎ) നിർണയിച്ച വില അനുസരിച്ച് ഇന്ന് ഒരു ഗ്രാം വെള്ളിക്ക് ഒരു രൂപ കുറഞ്ഞ് 106 രൂപയാണ്. എന്നാൽ, ഇതേ സംഘടനയിലെ എസ്. അബ്ദുൾ നാസർ വിഭാഗം ഒരു ഗ്രാം വെള്ളിക്ക് 109 രൂപയാണ് ഈടാക്കുന്നത്.
18 കാരറ്റ് സ്വർണ്ണത്തിന്റെ വിലയിലും ഈ രണ്ട് വിഭാഗങ്ങൾക്കിടയിൽ വ്യത്യാസമുണ്ട്. എകെജിഎസ്എംഎ (ഡോ.ബി. ഗോവിന്ദൻ വിഭാഗം) ഒരു ഗ്രാം 18 കാരറ്റ് സ്വർണ്ണത്തിന് 7,240 രൂപയാണ് വില നിശ്ചയിച്ചിരിക്കുന്നത്. എന്നാൽ, എസ്. അബ്ദുൾ നാസർ വിഭാഗം ഇത് 7,185 രൂപയ്ക്കാണ് വിൽക്കുന്നത്.
ഡോളറിനെതിരെ ഇന്ത്യൻ രൂപയുടെ മൂല്യം ആറ് മാസത്തെ ഏറ്റവും ഉയർന്ന നിലയായ 83.78 ൽ എത്തിയ സാഹചര്യത്തിലാണ് കേരളത്തിൽ സ്വർണ്ണവിലയിൽ ഇന്ന് മാറ്റമില്ലാതെ തുടരുന്നത് എന്നത് ശ്രദ്ധേയമാണ്.
