കോലാപൂര്‍: മഹാരാഷ്ട്രയിലെ കോലാപൂരില്‍ ഛത്രപതി ശിവജി മഹാരാജിന്റെ പ്രതിമ ഗാന്ധി ശനിയാഴ്ച അനാച്ഛാദനം ചെയ്തു. രാജ്യത്തെ ഭരണഘടനയും സ്ഥാപനങ്ങളും തകര്‍ത്ത് ജനങ്ങളെ ഭയപ്പെടുത്തി ബിജെപി ശിവാജി മഹാരാജിന് മുന്നില്‍ തലകുനിച്ചിട്ട് കാര്യമില്ലെന്ന് കോണ്‍ഗ്രസ് നേതാവ് രാഹുല്‍ ഗാന്ധി വ്യക്തമാക്കി. പ്രതിമ അനാച്ഛാദനം ചെയ്യുന്നതിന് മുമ്പ് പൊതുയോഗത്തില്‍ സംസാരിക്കുമ്പോഴായിരുന്നു രാഹുലിന്‍രെ ഈ പരാമര്‍ശം. സിന്ധുദുര്‍ഗ് ജില്ലയിലെ രാജ്കോട്ട് കോട്ടയില്‍ യോദ്ധാവായ രാജാവിന്റെ പ്രതിമ തകര്‍ന്ന സംഭവത്തില്‍ ഭരണകക്ഷിയായ ഭാരതീയ ജനതാ പാര്‍ട്ടിക്കെതിരെ (ബിജെപി) ശക്തമായ വിമര്‍ശനവുമായിട്ടാണ് രാഹുല്‍ എത്തിയത്.
പാര്‍ട്ടിയുടെ പ്രത്യയശാസ്ത്രം ശരിയല്ലെന്നും അദ്ദേഹം പറഞ്ഞു.രാജ്യം എല്ലാവരുടേതുമാണ് എന്നതാണ് ഛത്രപതി ശിവജി ലോകത്തിന് നല്‍കിയ സന്ദേശമെന്നും ഗാന്ധി പറഞ്ഞു.യോദ്ധാവ് രാജാവ് എന്തിനുവേണ്ടി നിലകൊള്ളുന്നു എന്നതിന്റെ പ്രകടനമാണ് ഇന്ത്യന്‍ ഭരണഘടനയെന്നും അദ്ദേഹം പറഞ്ഞു. ഛത്രപതി ശിവജി മഹാരാജിനെയും ഷാഹു മഹാരാജിനെയും പോലുള്ളവര്‍ ഇല്ലായിരുന്നുവെങ്കില്‍ ഭരണഘടനയും ഉണ്ടാകുമായിരുന്നില്ലെന്നും അദ്ദേഹം കൂട്ടിച്ചേര്‍ത്തു. ശിവാജി മഹാരാജിനോടും അദ്ദേഹത്തിന്റെ പ്രതിമ തകര്‍ന്നതില്‍ മുറിവേറ്റവരോടും ക്ഷമാപണം നടത്തിയ പ്രധാനമന്ത്രി നരേന്ദ്ര മോദിയെ ലക്ഷ്യമിട്ടായിരുന്നു അദ്ദേഹത്തിന്റെ പരാമര്‍ശങ്ങള്‍.
ഛത്രപതി ശിവാജി മഹാരാജ് വെറുമൊരു പേരോ രാജാവോ അല്ല. ഞങ്ങള്‍ക്ക് അദ്ദേഹം നമ്മുടെ ദൈവമാണ്. ഇന്ന് ഞാന്‍ അദ്ദേഹത്തിന്റെ പാദങ്ങളില്‍ തല കുനിച്ച് എന്റെ ദൈവത്തോട് മാപ്പ് ചോദിക്കുന്നുവെന്ന് ഓഗസ്റ്റ് 30 ന് മഹാരാഷ്ട്ര സന്ദര്‍ശന വേളയില്‍ മോദി പറഞ്ഞിരുന്നു. നാവിക ദിനത്തോടനുബന്ധിച്ച് 2023 ഡിസംബര്‍ 4 ന് പ്രധാനമന്ത്രി അനാച്ഛാദനം ചെയ്ത 35 അടി പ്രതിമയാണ് ഓഗസ്റ്റ് 26 ന് തകര്‍ന്ന് വീണത്.
