മുംബൈ: പ്രമുഖ മാധ്യമ ശൃംഖലയായ സീ എന്റർടെയിൻമെന്റ് എന്റർപ്രൈസസിൽ (ZEEL), സ്ഥാപകരായ ഗോയങ്ക കുടുംബത്തിന് ഓഹരി പങ്കാളിത്തം വർധിപ്പിക്കാനുള്ള നീക്കത്തിന് ഓഹരിയുടമകളുടെ ബ്ലോക്ക്. വാറന്റുകൾ വഴി 2237 കോടി രൂപ സമാഹരിച്ച് കമ്പനിയിലെ തങ്ങളുടെ ഓഹരി വിഹിതം 3.99 ശതമാനത്തിൽ നിന്ന് 18.39 ശതമാനമായി ഉയർത്താനുള്ള പ്രമേയം, വോട്ടെടുപ്പിൽ ഭൂരിപക്ഷം ലഭിക്കാത്തതിനെ തുടർന്ന് പരാജയപ്പെട്ടു.
സോണിയുമായുള്ള ലയനം പരാജയപ്പെട്ടതിന് ശേഷം, ചെലവ് ചുരുക്കിയും പ്രവർത്തനങ്ങൾ മെച്ചപ്പെടുത്തിയും മുന്നോട്ട് പോകാൻ ശ്രമിക്കുന്ന കമ്പനിക്ക്, ഓഹരിയുടമകളിൽ നിന്നേറ്റ ഈ തിരിച്ചടി വലിയൊരു പ്രതിസന്ധിയാണ് സൃഷ്ടിച്ചിരിക്കുന്നത്.
വോട്ടെടുപ്പിൽ പങ്കെടുത്ത 59.5% ഓഹരിയുടമകൾ മാത്രമാണ് പ്രമേയത്തെ പിന്തുണച്ചത്. സ്പെഷ്യൽ പ്രമേയം പാസാകാൻ 75% വോട്ട് വേണമെന്നിരിക്കെയാണ് ഇത് പരാജയപ്പെട്ടതെന്ന് സീ എന്റർടെയിൻമെന്റ് സ്റ്റോക്ക് എക്സ്ചേഞ്ചിനെ അറിയിച്ചു.
എന്തുകൊണ്ട് ഓഹരിയുടമകൾ എതിർത്തു?
ഗോയങ്ക കുടുംബത്തിന് കുറഞ്ഞ വിലയിൽ ഓഹരികൾ നേടാൻ അവസരമൊരുക്കുന്ന ഈ നീക്കം, നിലവിലുള്ള മറ്റ് ഓഹരിയുടമകളുടെ ഓഹരി മൂല്യത്തിൽ ഇടിവുണ്ടാക്കുമെന്ന് (share dilution) പ്രോക്സി ഉപദേശക സ്ഥാപനങ്ങളായ ഇൻഗവേണും, ഐഐഎഎസും ചൂണ്ടിക്കാട്ടിയിരുന്നു. ഈ നീക്കത്തിനെതിരെ വോട്ട് ചെയ്യാനും അവർ ഓഹരിയുടമകളോട് ശുപാർശ ചെയ്തു.
കമ്പനിയിൽ 96% ഓഹരികളും പൊതു നിക്ഷേപകരുടെ കയ്യിലാണ്. ഇതിൽ എൽഐസി, എച്ച്‌ഡിഎഫ്‌സി മ്യൂച്വൽ ഫണ്ട് തുടങ്ങിയ വൻകിട സ്ഥാപനങ്ങളും ഉൾപ്പെടുന്നു. മുൻപും സിഇഒ പുനിത് ഗോയങ്കയുടെ പുനർനിയമനം ഉൾപ്പെടെയുള്ള വിഷയങ്ങളിൽ ഓഹരിയുടമകൾ മാനേജ്മെന്റിന്റെ തീരുമാനങ്ങളെ തടഞ്ഞിട്ടുണ്ട്. ഇത് കമ്പനിയിലെ ഓഹരിയുടമകളുടെ വർധിച്ചുവരുന്ന ശക്തിയാണ് കാണിക്കുന്നത്.
