ബിജെപിയെ കേരളത്തില്‍ അധികാരത്തിലെത്തിക്കും: രാജീവ് ചന്ദ്രശേഖര്‍
ബിജെപിയെ അധികാരത്തിലെത്തിച്ച് മാത്രമേ മടങ്ങൂവെന്ന് രാജീവ് ചന്ദ്രശേഖര്‍. ബി.ജെ.പി സംസ്ഥാന അധ്യക്ഷനായി ചുമതലയേറ്റ ശേഷമായിരുന്നു പ്രഖ്യാപനം. കേരളം എപ്പോഴും എന്തുകൊണ്ട് പിന്നോട്ട് പോകുന്നുവെന്ന് ചിന്തിക്കണം. നോക്കുകൂലിയുള്ള കേരളമല്ല, നിക്ഷേപവും തൊഴിലുമുള്ള കേരളം വരണം. മോദി ഇന്ത്യയെ വളര്‍ത്തിയ പോലെ കേരളവും വളരണമെന്നും ബി.ജെ.പി അധ്യക്ഷന്‍ പറഞ്ഞു.
രാഷ്ട്രീയവിജയം നേടാന്‍ കഠിനാധ്വാനം വേണം. പ്രവര്‍ത്തകരാണ് ശക്തി, ബലിദാനികളുടെ ത്യാഗം ഓര്‍ത്ത് മുന്നോട്ടുപോകും. ബി.ജെ.പി ഇനിയും പ്രവര്‍ത്തകരുടെ പാര്‍ട്ടി ആയിരിക്കുമെന്നും സംസ്ഥാന അധ്യക്ഷന്‍ കൂട്ടിച്ചേർത്തു.
മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍ അധ്യക്ഷത വഹിച്ച സംസ്ഥാന പ്രതിനിധിസമ്മേളനത്തില്‍ ബിജെപി കേരളാ പ്രഭാരി പ്രകാശ് ജാവദേക്കര്‍, സഹപ്രഭാരി അപരാജിത സാരംഗി, കേന്ദ്രമന്ത്രിമാരായ സുരേഷ് ഗോപി, ജോര്‍ജ്ജ് കുര്യന്‍, മുന്‍കേന്ദ്രമന്ത്രി ഒ. രാജഗോപാല്‍, പി.കെ കൃഷ്ണദാസ്, ദേശീയ വൈസ് പ്രസിഡന്റ് അബ്ദുള്ളക്കുട്ടി, ദേശീയ സെക്രട്ടറി അനില്‍ ആന്റണി, കേരളത്തിലെ ബിജെപി സംസ്ഥാന ഭാരവാഹികള്‍ എന്നിവര്‍ പ്രസംഗിച്ചു. താഴേത്തട്ടുമുതല്‍ സംസ്ഥാന തലം വരെ പൂര്‍ത്തിയാക്കിയ സംഘടനാ തെരഞ്ഞെടുപ്പിന്റെ വിജയകരമായ നടപടികള്‍ സംസ്ഥാന വരണാധികാരി അഡ്വ. നാരായണന്‍ നമ്പൂതിരി വിശദീകരിച്ചു.
