മണിപ്പുരിൽ വിദ്യാർഥികളുടെ നേതൃത്വത്തിൽ നടന്ന രാജ്ഭവൻ മാർച്ചിനിടെ വൻ സംഘർഷം . പ്രതിഷേധക്കാർ രാജ്ഭവനു നേരെ കല്ലെറിഞ്ഞു. സംഘർഷത്തിൽ 20 പേർക്ക് പരുക്കേറ്റു.
സിആർപിഎഫിന്റെ വാഹനവ്യൂഹം സമരക്കാർ ആക്രമിച്ചതായി റിപ്പോർട്ട് ചെയ്യപ്പെടുന്നു. വിദ്യാർഥികൾ സംസ്ഥാനത്തുനിന്ന് സായുധസേനയെ പിൻവലിക്കണമെന്നും, അടുത്തിടെ ഉണ്ടായ ഡ്രോൺ, മിസൈൽ ആക്രമണങ്ങൾക്കു പിന്നിൽ ആരാണ് എന്നത് കണ്ടെത്തണമെന്നും ആവശ്യപ്പെട്ടു.
ഒരാഴ്ചയായി മണിപ്പുരിൽ തുടങ്ങിയ പുതിയ ആക്രമണങ്ങളിൽ ഇതുവരെ 8 പേർ കൊല്ലപ്പെട്ടു, 12 പേർക്ക് പരുക്കേൽക്കുകയും ചെയ്തിട്ടുണ്ട്.
ഈ സംഭവങ്ങൾക്കൊടുവിൽ, മുഖ്യമന്ത്രി എൻ.ബീരേൻ സിങ്, ഗവർണർ എൽ.ആചാര്യ എന്നിവരുമായി വിദ്യാർഥികൾ ചർച്ച നടത്തിയിരുന്നു. ഗവർണറോട് 6 ആവശ്യങ്ങൾ മുന്നോട്ട് വച്ചതായാണ് വിവരങ്ങൾ.
വിദ്യാർഥികളുടെ ആവശ്യങ്ങളിൽ, ഡിജിപി, സർക്കാർ ഉപദേഷ്ടാവ് എന്നിവരെ അക്രമം തടയുന്നതിൽ പരാജയപ്പെട്ടതിന്റെ ഉത്തരവാദിത്വം ചുമത്തി പുറത്താക്കുക, സിആർപിഎഫ് ഡിജി കുൽദീപ് സിങ്ങിന്റെ നേതൃത്വത്തിലുള്ള യൂണിഫൈഡ് കമാൻഡിന്റെ പ്രവർത്തനം സംസ്ഥാന സർക്കാരിന് കൈമാറുക എന്നിവ ഉൾപ്പെടുന്നു.
നിലവിൽ, മണിപ്പുരിലെ ക്രമസമാധാനച്ചുമതല കേന്ദ്ര ആഭ്യന്തര മന്ത്രാലയത്തിന്റെ മേൽനോട്ടത്തിലുള്ള യൂണിഫൈഡ് കമാൻഡാണ്.
